Започнувањето со работа на проекти како нова организација е предизвик, особено кога тимот нема претходно проектно искуство. Потребно е да се научи како да се препознаат можностите за финансирање, да се развие квалитетна проектна апликација, да се најдат партнери, но и како еден проект успешно да се планира, реализира, комуницира и дисеминира.
Тоа бара време, знаење и многу вложување, а успехот не е секогаш загарантиран. Сепак, Erasmus+ програмата нуди значајна можност организациите постепено да ги развиваат своите капацитети преку мобилности и обуки за нивниот кадар.
По претходната обука за развивање и пишување проектни апликации, за која нашата организација доби поддршка преку Erasmus+, БУДЕЊЕ 2023 доби можност да продолжи со градење на своите капацитети преку обука посветена на управување со едукативни проекти.
Двајца претставници на организацијата учествуваа на обуката „Digital Tools for Managing Projects in Education“, која се одржа во Рим од 20 до 25 јули 2026 година.
Обуката беше практично ориентирана и покажа како дигиталните алатки можат да се користат во различни фази од проектниот циклус – од планирање и организација, преку тимска комуникација и соработка, до дисеминација и собирање повратни информации.
Работевме со Trello и Asana за планирање и следење на проектните задачи, Google Drive и Google Docs за организација на документацијата, Zoom, Google Meet и Microsoft Teams за онлајн состаноци, како и WordPress, Canva и социјалните медиуми за креирање и споделување содржини. Запознавме и алатки за онлајн brainstorming, mind mapping, креирање инфографици, снимање и уредување видеа и собирање feedback.
За нас, најзначајна беше практичната примена на наученото. Стекнатите знаења ќе ги применуваме во идните проекти преку подобро планирање и следење на задачите, поорганизирано управување со проектната документација, поефикасна комуникација со партнерите и поквалитетна дисеминација на проектните резултати.
Особено важно е што знаењето стекнато преку мобилноста нема да остане само кај учесниците. Во следниот период планираме да ги споделиме научените практики со останатите членови на организацијата и постепено да ги воведеме избраните алатки во нашата секојдневна проектна работа.
Искуството од обуката ни покажа дека дигиталните алатки не се само техничка поддршка. Кога се правилно избрани и користени, тие можат да го направат проектниот менаџмент поорганизиран, комуникацијата поефикасна, а проектните резултати повидливи и подостапни за целните групи.
За БУДЕЊЕ 2023, оваа мобилност претставува уште еден чекор во развивањето на организациски капацитети и создавањето на посилна основа за идно учество во европската образовна соработка.
Мобилноста е реализирана со поддршка на програмата Erasmus+.
No responses yet